講到聖誕，相信唔少人都曾經對聖誕老人抱有憧憬，而今個聖誕，就可以黎ifc了解下聖誕老人嘅工作！同美國Northern Lights Santa Academy合作，ifc嘅「 Santa Academy」有6個互動區域，俾你學習聖誕老人代表性嘅Ho!Ho!Ho!笑聲以至聖誕老人既服飾，掌握做聖誕老人嘅本領！

喜愛童話嘅你就一定要黎「Starlight Garden夢遊奇幻聖誕」！以「愛麗絲夢遊仙境」為主題，新城市廣場嘅空中花園以燈光、鏡面同投影等原素佈置「奇異玫瑰花」、「閃爍鏡海」、「大咀貓咪」等，今個聖誕不如就跳入兔子洞穴，進入仙境過個美妙奇幻嘅聖誕夜啦！

聖誕老人打扮既Tsum Tsum米奇老鼠同一班好友來到朗豪坊同大家過聖誕！「迪士尼 Tsum Tsum 聖誕市集」有由各迪士尼好友疊成逾4米高嘅聖誕樹，坐滿各位迪士尼好友朋友嘅火車、小屋等，上空仲有11個巨型Tsum Tsum燈泡氣球，鍾意迪士尼角色嘅朋友們唔好錯過啦！

今個聖誕無得去旅行？唔緊要，香港一樣有得感受外國氣氛！今年利東街帶來英國倫敦攝政街聖誕燈飾「The Spirit of Christmas」，展示其中5個代表性燈飾，令成條利東街充滿節日氣氛。著返套英倫風裝束影相打卡，隨時比人葡萄以為你去左英國呀！

MegaBox就有可愛又夢幻嘅「Little Twin Stars 聖誕夢幻樂園」等緊你去打卡！商場外已經可見Little Twin Stars嘅身影，入到商場仲有掛滿玫瑰花嘅30呎高粉紫色巨型聖誕樹，同多個Little Twin Stars嘅佈景比大家影相打卡！巨型聖誕樹每15分鐘就會進行一次音樂燈光Show，場內既LED燈飾會隨音樂變化，記住唔好錯過！

多啦A夢經典道具—隨意門、記憶麵包、時光機等相信大家都識，今個聖誕黎到「多啦A夢研究所」就有機會試下呢d道具啦！除左體驗經典道具，仲有20呎高嘅多啦A夢，有得打卡又有得玩，各位道具研究員，準備好未呀？

想過個浪漫嘅聖誕就唔可以錯過新都會廣場嘅玫瑰花燈海！今個聖誕，新都會廣場嘅露天廣場舖滿閃爍燈光，沿住滿滿玫瑰花嘅樓梯走，經過霓虹玫瑰牆，最後到達24呎高嘅鏡面水晶玫瑰聖誕樹，撞正指定時間入到聖誕樹入面嘅話仲有吹雪效果，真係夠曬浪漫呀！每晚6至10點仲會每一小時上演玫瑰燈光匯演，去嘅時候記住就啱時間！

呢個聖誕唔想留係地球？咁不如衝上宇宙啦！The ONE為大家帶黎BT21宇宙聖誕佈置「冬日夢幻漫遊宇宙」，唔單止有掛滿BT21掛飾既聖誕樹，仲多個宇宙聖誕佈景比大家同咁多BT21成員合照，忠粉們係時候上啦！

V City就有Chocolate Rain陪大家過聖誕！「Chocolate Rain咖啡杯」、 「Chocolate Rain茶檔士多」、「Chocolate Rain許願樹」、「Chocolate Rain幸福森林小屋」，全部都係影相位，等著你黎打卡！除左影靚相，仲有2個互動遊戲「聖誕體感禮物屋」同「飄雪尋寶大行動」，鍾意Chocolate Rain嘅你記住去啦！

邊個話聖誕節唔係紅就係綠！今個聖誕，布甸狗就話你知，聖誕節都可以係軟綿綿既粉黃色。黎到荃灣廣場，「Pompompurin部屋聖誕派對」內有多個同布甸狗合照既影相位，仲有由6層布甸狗公仔砌成嘅11呎高既黃色聖誕樹！上去商場L5太空樂園仲有超巨型充氣布甸狗，fans一定要去瘋狂影相打卡呀！

冬天就唔少得毛茸茸既公仔！今年黎到德福廣場，就有過百隻來自德國既泰迪熊同大家歡度聖誕！4米高嘅巨型泰迪熊絕對係一大打卡景點，另外仲有逾40款唔同造型嘅泰迪熊珍藏品，加埋飄雪新天鵝堡，又可以呃朋友（其實係自己）話你去左德國啦！